Oratoriu civili pi lu Fistinu

ORATORIU PICCIRIDDU  'PU FISTINU

di Lu Senatu e lu Populu

    e la civitati di Palermu

MATTINALI

                                           L'assissuri nun sapìa

L'assissùri  nun sapìa

 si l'àrbiru  cadìa.

E certu !

Lu Cunsìgghiu nun cunsìgghia...

e  disjùnta  e' la  so' Junta .

Ma lu Sìnnacu nun vìgghia ?

Qualcunu lu va' ppìgghia ?

Unn'e' ? a  Bonn,

a  Berlino,

'nta Germania ..

..ecchhi  cci va  a  fari ?

 gran chiffari 'un c'e' gia' cca'??

..No,signuri cari,

c'e' l'UNESCO

appena ù sentu

c'u  rinfresco

Cca 'm Palermu

cummattièmu

ccu l'arbusceddi  virdi

ch'un pònnu chiu' campàri

picchi' un tram

c'havi a passàri

o un trenu di suttèrra

miravìgghia  di la terra ,

la sèttima  o l'ottàva

iòrni fa mi lu cuntàva

l'ingignèri ingignirùsu

chiu' pirsuàsu ca cunfùsu

l'assissùri nun sapìa

quantu scàvi fatti avìa

lu prugèttu lu liggìu

cu nìputèddu mbràzza :

ci tirava la varbazza !

e l'occhiali  ci scippo' !

e piccio' un sinn'adduno'  !

Mischinèddu

cu cci po'

cu niputeddu ....

L'URA  'n ti MENZA

                                              Sintèmunni ,ogni tàntu ...

Tràsi e nèsci  nèsci e tràsi

imu tàri tàrsu e tàsi

sùlu chìstu sànnu fari

si lu sìnnacu av'acchianàri

tu lu trovi in mènzu 'a via

quànnu scìnni  p'u cafè

quannu poi 'l elèttu sia

scurdatìlla a  fàccia pìa

Nùn ascùta màncu  chiu'

chìddu ca ci dìci tu

mentri prima cu l'arìcchi

attintava ,e pùru l'occhi

e' mpignatu

m'pignatùni

iddu u sapi 'nzoccu à fari

ma siccòmu a  nuàtri pari

chi n'antìcchhia  su scurdo'

ci dicemu qualchi cosa,sulu

pa'iutàllu un po' :

Coro :

li casi  e li tirrini ,

usàmmuli

ppi tutti quanti:

picchì hannu a dòrmiri

'nta  na machina  sfasciata

patri mugghieri e picciriddi ?

quànnu  avèmu

n'arrètu a  li facciàti

li stanzi  di palazzi

 tutti  vacànti ?

E  a chi  cci  sèmu,

Usàmmuli puru ppi  spettàculi e cunti e canti  .

Vulèmu lu tràm , ca fa nn'arreri  e avanti 

ma no ,figghiu miu ,   scavazzànnu l'arburùzzi beddi

ca  ìddu cc'ha  rifrìsca  a lu turista

mentri  la granita trìta

e la  broscìna nica .E ppùru  a l'aciddùzzi, c'ancòra  si mèritanu  cantàri

'nti sta  conca  ca fu  d'oru

E Puru l'oru  su  fu...ttèru....

E senza  spunnàri sfriggiàri e sminnàri  ammàtula  li chiàzzi

c'accussì s' addiventa  la  citta'  di  cannavàzzi

l'urbanistica cci  dici assài cosi 

 pi essiri  filici

All'ambulànti e  a li migrànti  dàmuci un cantùzzu , ppi fari  ognùnu u so' panùzzu

li reguli facèmu rispittàri, pi  chhìddi  c'hànnu a  dòrmiri la  sìra

p' a matina ch'hànnu a travagghiàri

E ppùri  pi    fari  addivirtìri , ma  senza  inquitàri , chiddi  ca  sùnnu lagnusèddi

o  chi la notti la vìvinu cuntènti

ppi scurdàri lu màli ca e' 'nto mùnnu

 Chistu basta  , ppi mumèntu,

 ma sintèmmuni, ogni tàntu.......,

PPI  LA SESTA  'URA

                                       

                                                         Pulìtica  nova

L'uffiziali e l'onorevoli ,

nun capìsciu nzòccu fu,

nun si pàrranu quasi  chhiu'

Si tu vo' na cosa pura

c'ha chiamàri magistratura

NUN PO'  ESSIRI 'sta cosa ,

e nun si nèsci ,

Videmu allura s'arrinèsci

la pulìtica nòva  :

la civitàti  fatta  e'  di l'arma  d'i cittadini

'ca  nun c'abbàsta  ca  vannu a  vutàri

ma ,cu l'ìnternet , d ' oggi  vònnu sempri parràri

e pònnu  accussì parràri  puru  cu l'eletti

'ca lu mistèri nun ci vònnu arrubbàri,

picchi elètti sùnnu,

ma  vonnu i l'ayìtàri.

E Picchi s'ìddi un si  fannu ayitàri,

lu so mistièri  addiventa  comu a  nuàtri  sdirrubbàri .

Politica nòva  chistu  e' :

chiamari  i cristianeddi a pinsàri,

pruvicàri,

prisintàri e  guidàri li scelti di l'eletti,

ppi fari  picca  dannu  e cchiu '  vèru guadàgnu.

VESPRI SULENNI

                                        Preci a  La  Santuzza pi li Cunsulti  , a lu Teatru  du  Suli

Participaziòni !..ohe' ..!  participaziòni !

Bèni Cumùni e Sùmmu ....

currìa la vuci , ed  era  duci sintìlla ddòpu anni  di  stènti .

La primavera  veni arrèri ,si dicìa . ..Ma poi tuttu si firmo' .

Nunn'e'  a  participazioni sulu quannu  la  Santuzza s'affaccia ,

cu so visu friscu e olizzùsu ,

au balcuni du Tiatru du Suli ,

quannu li palermitani ,

nichi e  nicuzzi , granni e vicchiareddi,

ebbri cci  acclàmanu :  Viva Palemmu e  viva  Tìa ,

Santuzza  Rosalia !

E picchì  unu  avissa  acchianàri  supra lu to carru ,Santuzza,

 si poi nun ascùta li gentùzzi ca lu mannàru , chi lu fìciru acchianàri ?

Picchì  la Pèsti , ca Tu  ccù putenza livàsti ,

la vincìsti  cu li preci d'ognùnu ...

Chìsti , inveci , a malapena n'ascùtanu  siddiati e frittulusi. !

Pi nasciri  arre' , Patrunuzza , i baruni e i putenti l' hànnu a  capìri : 

hannu a  sintìri lu populu  sovranu .

Ca' mi pari  ca 'sta' suvranànza  iddi  si la  scurdaru  di bella .

Picchì  vulèmu  li To'  ciura  'nti  nostri  straduzzi , e no la munnizza ;

picchì  vulèmu  lu travàgghiu  pi purtàri  a  casa  l' onestu   pani....

nun  vulemu   quattru  regoli  'nfingardi  , ca funzionanu pi unu si e  l' àutru no.

La filicita' e' viviri  'ntra na  casa  , cu 'na famigghia  ,

 unni  ognunu  fa la so arti e la propria parti ,

parra , macari s'accapigghia ,  ma poi

..cu la  paci 'nto cori  s'arrisbigghia 

e  sapi  puru  diri : veru  e' , c'avìatu  raggiùni .

E   accussi' si va'  avanti.

E nuàtri di Palermu , sutta  di Tia ,  Santuzza ,  sèmu  famigghia ,

e  vulèmu   essiri  sulu  ascutàti  e  cunsidiràti  n'antìcchia ,

...no pero' comu  'na lintìchhia .

Tantu tempu ormai lu chiedèmu   , e nun c'a facièmu  chiu' :

A Li Cunsulti  , Santuzza ,  'm  Palermu  , pensaci e  ....participa puru Tu.

M.G

Festino   2015